चुनावमा फैलिन सक्ने भ्रामक सूचना नियन्त्रणमा आयोगको प्रयास : सामाजिक सञ्जालसँग सहकार्य

असोज ४,काठमाण्डाै – चुनावका बेला फैलिने भ्रामक सूचना तथा अफवाह नियन्त्रण गर्न निर्वाचन आयोगले सामाजिक सञ्जालसँग सहकार्य थालेको छ ।

मंसिर ४ गते हुने प्रतिनिधि सभा र प्रदेश सभा चुनावका बेला सामाजिक सञ्जालमार्फत मिथ्या र भ्रामक सूचना फैलिन सक्ने भन्दै आयोगले फेसबुक, टिकटक, युट्युबलगायत सामाजिक सञ्जालसँग सहकार्य थालेको हो ।

आयोगका प्रवक्ता शालिग्राम शर्मा पौडेलका अनुसार यसअघिका चुनावमा पनि सामाजिक सञ्जालमार्फत भ्रामक सूचना सम्प्रेषण भएकाले त्यस्ता सूचना फैलिन नदिन यसपालि सामाजिक सञ्जालसँग सहकार्य सुरु गरिएको हो ।फेसबुकले गएको भदौ २२ गते पोलिटिकल एड ट्रान्सपरेन्सी टुल सार्वजनिक गरेको थियो । यसमा नेपाललगायत २ सय ४२ वटा देश आबद्ध छन् । यो टुलमा जोडिएपछि फेसबुकमा राजनीतिक वा चुनावसँग सम्बन्धित प्रचार वा विज्ञापन गर्न फेसबुकको अथोराइजेसन प्रक्रिया पूरा गर्नुपर्छ ।

अथोराइजेसन प्राप्त गरेपछि विज्ञापन कसले कति समयका लागि गरेको, कुन ठाउँबाट गरेको र कति पैसा खर्च गरिएको लगायत सूचनाको सारांश फेसबुकले सार्वजनिक रुपमा देखाउँछ । फेसबुकको एड लाइब्रेरीमा गएर जसले पनि विज्ञापन सम्बन्धी यी जानकारी प्राप्त गर्न सक्नेछन् । यस्तो जानकारी सात वर्षसम्म एड लाइब्रेरीमा रहने आयोगले जनाएको छ।

Leave A Reply

Your email address will not be published.